අප සදාදරණීය ගී පද රචක ප්‍රේමකීර්ති ද අල්විස් ශූරීන් අතින් ලියැවුනු ගීත ගොන්නට එක්වූ තවත් අපූරු ගීතයකි 'චාරු දේහේ නුරා' ගීතය. විශාරද අමරසිරි පීරිස් විසින් සංගීතවත් කර ගායනා කරනු ලබන මෙම ගීතය ජීවිතය, යෞවනය, ප්‍රේමය සහ... සෘංගාරය යන සියල්ල එකට කැටි උන ඉතා සුන්දර ගීතයකි.
චාරු දේහේ නුරා මා දෑසේ මැවේ
රාත්‍රියේ රෑ සඳේ ඈ සිනා ශ්‍රීය දේ.....
තරුණයකු, තරුණියක වෙනුවෙන් හෝ පෙම්වතකු තම පෙම්වතිය වෙනුවෙන්, සැමියකු තම බිරිඳ වෙනුවෙන් ඉපැදුනු සිතුවිලි ඉතා ලංකාරව ඉදිරිපත් කිරීමක් ලෙසින් මෙම ගීතය දැක්විය හැකිය.
චාරු යනු ශෝභන, සුන්දර යන්නයි. ඇයගේ අනුරාග දනවන සුන්දර වූ රුව ඔහුගේ සිතේ (දෑස යනුවෙන් මෙහිදී දක්වන්නේ ඔහුගේ සිතේ ඇයගේ රුව දෑස ඉදිරිපිට මෙන් මැවීමයි ) ජනිත වේ. රාත්‍රියට පායන සඳ කැලුම්, කාන්තිය ඔහුට මතකයට ගෙනෙන්නේ ඇයගේ සිනාවයි. එතරම්ම ඇය ඔහුට ආකර්ශනීය, ආදරණීය වේ.
පිහින පීනා රසෝඝේ..
සරාගී විලේ රාත්‍රි යාමයේ...
ඈගේ දෑසේ ප්‍රබෝදේ නුරා ගී මැවේ...
ජීවිතේ.. යෞවනේ..ප්‍රේමයේ..මීවනේ...
රසෝඝය යනු රසය නැමති සැඩ දිය පහර යන අර්ථය දේ. ඔහුත් ඇයත් එක්ව ගත කරන රාත්‍රියක් ඔහුට කෙතරම් සුන්දර දැයි ඉතා අලංකාරව මෙම පද පෙලවල් තුල ගලපා ඇත.
ඔවුන් දෙදෙනා කායික මෙන්ම මානසික රසය තුල පිහිනමින් රාත්‍රිය ගෙවයි. දෙදෙනා කෙතරම් රාගිකව හා ආදරණීයව වෙලී ඇතිද කියතොත් ඔවුන් ජීවිතයේ දෙදෙනෙකු එකතුවීමේ ඇති රසය විදී. එය කෙතරම්දයත් රසය නැමති ගංගාව ඉතා ප්‍රචන්ඩව ගලා යන මුත් එහි පීනා විනෝද වන තරමට එය මිහිරි‍ය.
මේ අතර තුර ඇයගේ දෙනෙතෙහි ඇති රාගික ප්‍රබෝධය (උනන්දුව, පිබිදීම ) දැකීම ඔහු සිත තවත් රසය සොයා යාමට ඇය කරන ආරාධනයක් ලෙසින් ඔහුට දැනේ. එය කෙතරම් සුන්දරද යත්, ඔහුට අනුරාගයේ (නුරා යනු පස්කම් සැපය පිලිබඳ යන අරුත දේ ) ගී ඔහු සිත තුල මවාලයි. මේ ඔහුගේ ජීවිතයයි, ඔහුගේ තාරුන්‍යයයි, ප්‍රෙමයයි. එමෙන්ම මෙය ඔහුට "මී වන" හා සම වේ. "මී වන" යනු "මී පැණි වැනි" යන අරුත දේ.
සීත මිහිදුම් වළාවෝ වෙළීලා සඳේ තාරකාවේ..
මිහි තලාවේ තුසීතේ මැවේ මා හදේ...
ජීවිතේ ... යෞවනේ....ප්‍රේමයේ... මී වනේ...
සඳ තරු වසා සීතල මිහිදුම් වලාකුළු වෙලී රාත්‍රිය තවත් ප්‍රේමයටම සිත කැඳවයි. එය ඔහුට තව තවත් ඇයට තුරුලු වීමටම සිත් දෙයි. තුසිතය යනු දෙව්ලොවකි. නමුත් ඔහුට මේ මහ පොලව මතු පිට (මිහි තලාවේ, මිහි යනු මහ පොලව යන අරුත ද තලාව යනු මතුපිට යන අරුතද දක්වයි) තුසිත දෙව්ලොව මැවුනා සේ ඔහුගේ හදවත පිරී ඇත. මේ ඔහුගේ ජීවිතයයි, ඔහුගේ තාරුන්‍යයයි, ප්‍රෙමයයි. මෙය ඔහුට මී පැණි මෙන්ම රසවත්ය.
ප්‍රේම කීර්ති මහතා සතු සිංහල භාෂාව පිලිබඳ පුලුල් දැනුම මෙම ගීතයේ ඇති සුන්දර යෙදුම් අනුව මනාව පැහැදිලි වේ. ඔවුන් වැන්නවුන් සිතිය යුතු යුගයක ඔවුන් නැති අඩුව අපට නිබඳව දැනේ.
0 comments:
Post a Comment